New features in Android 4.2 (Jelly Bean)

ဒီနေ့မနက်ဘဲ Galaxy Nexus အတွက် Android 4.2 update ရတယ်။ update စပေးတာ တစ်ပါတ်လောက်ရှိပြီဆိုပေမယ့် takju version တွေကို အရင်ပေးတော့ yakju က ဒီနေ့မှရတယ်။ Android 4.2 ကို Key Lime Pie လို့ နာမည်ပြောင်းမယ်ထင်တာ မပြောင်းဘူး။ Jelly Bean လို့ဘဲ ဆက်ခေါ်တယ်။ ICS (4.0.4) နဲ့ Jelly Bean (4.1.1, 4.1.2) ကြားမှာတုန်းက (ထောပါတ်သုတ်တာကလွဲရင်) ဘာမှ သိပ်ထူးထူးခြားခြား update မလုပ်လိုက်လို့ဖြစ်မယ်။ :D 4.2 မှာတော့ feature အသစ်တွေ အများကြီးပါလာတယ်။ အဓိက update ကတော့ photo sphere နဲ့ gesture typing တွေပါ။

၁။ Jelly Bean ရဲ့ codename က project butter ဆိုတဲ့အတိုင်း သိသိသာသာကို ချောမွေ့မြန်ဆန်လာတယ်။

၂။ Camera Controls - လူအများစုဟာ စမတ်ဖုန်းကို ဓါတ်ပုံရိုက်ပြီး အင်တာနက်မှာ ရှဲဖို့အတွက် အဓိက သုံးတယ်လို့ သုတေသီတွေက ဆိုတဲ့အတွက် Android team ကလည်း Camera app ကို စပါယ်ရှယ်ပြင်ရေးပုံရပါတယ်။ feature တွေ အသစ်တွေ အများကြီး တိုးလာတယ်။ ဓါတ်ပုံရိုက်နေရင်း လက်နှစ်ချောင်းနဲ့ pinch လုပ်ပြီး zoom in/out လုပ်လို့ရလာတယ်။ ညာဘက်အောက်နားက အဝိုင်းလေးကို tap လုပ်ပြီး settings, white balance, flash တွေ အလွယ်တကူ ပြောင်းလို့ရလာတယ်။ Android 4.0.1 မှာ panaroma capture ပါလာပြီး အခု Android 4.2 မှာ Photo Sphere ကို စတင်မိတ်ဆက်လာတယ်။


၃။ Photo Sphere mode ကိုသုံးပြီး ဖုန်းကင်မရာနဲ့ Google Street View လိုမျိုး ၃၆၀ ဒီဂရီ ရိုက်လို့ရတယ်လို့ ဆိုပါတယ်။ Photo Sphere နဲ့အတူ အဲဒီ ၃၆၀ဒီဂရီကို လှည့်ကြည့်လို့ရတယ့် Gallery feature ကို Google+ မှာ တပြိုင်တည်း release လုပ်တာ တွေ့ရတယ်။ (အခုရုံးမှာဆိုတော့ မစမ်းကြည့်ရသေးဘူး။ နောက်ရက်မှ သေချာစမ်းကြည့်ရမယ်။) သူများတွေရိုက်ထားတဲ့ပုံတွေတော့ တော်တော်မိုက်တယ်။
photo sphere collection 
Photo Sphere နဲ့ရိုက်တဲ့ပုံတွေကို JPEG format နဲ့သိမ်းပြီး ပုံနဲ့ပါတ်သက်တဲ့ အခြား information တွေကို open XML metadata အနေနဲ့ ပုံမှာ တွဲလျက် save လုပ်ထားတယ်လို့ဆိုတာကတော့ စိတ်ဝင်စားဖို့ ကောင်းပါတယ်။ Google+ မှာတင်လို့ရမယ်။ အီးမေးလ်ပို့လို့ရမယ်။ Facebook ကရော photo sphere ကို support လုပ်လာမလားဆိုတာ စောင့်ကြည့်ရပါမယ်။ 


 ၄။ Photo filter - Instragram တို့လိုမျိုး Gallery ကနေ ဓါတ်ပုံတွေ တိုက်ရိုက် edit လုပ်လို့ရလာပါပြီ။ သိပ်တော့ မစုံဘူး။ Gallery ကနေ ဓါတ်ပုံကြည့်ရင်း ပထမဆုံးပုံမှာ ဘယ်ဘက်ကို swipe လိုက်ရင် ကင်မရာကို ပြန်ဖွင့်ပေးတယ်။ 


၅။ Gesture typing - စာတစ်လုံးချင်း ရိုက်စရာမလိုဘဲ Swype လိုမျိုး ဆွဲဆွဲပြီး စာရိုက်သွားလို့ရတဲ့ function ကီးဘုတ်အသစ်မှာ ပါလာတယ်။ Swype ထက်အများကြီး smooth ပိုဖြစ်တယ်။ စာရိုက်ရတာ ပိုအဆင်ပြေလာတယ်။ 


၆။ Font - မြန်မာစာ အရင် ဇော်ဂျီ ဖောင့် embed လုပ်ထားတဲ့ webview app က မြန်မာစာတွေ မမြင်ရတော့ဘူး။ native app ကတော့ ကောင်းကောင်း အလုပ်လုပ်သေးတယ်။ 1st Myanmar Browser လည်း မြန်မာစာ မမြင်ရတော့ပြန်ဘူး။ Arabic unicode ကိုတော့ 4.1 မှာစပြီး fully-support လုပ်တာ တွေ့ရတယ်။ မြန်မာယူနီကုဒ်ကိုတော့ ဘယ်ခါ full-support လုပ်မလဲ မသိ။ (အခုက partially support လုပ်ထားတော့ ဇော်ဂျီကိုလည်း ကောင်းကောင်းဖတ်မရတော့ဘူး။ ယူနီကုဒ်လည်း အပြည့်အဝ ဖတ်မရသေးဘူး။)


၇။ Lock screen Widgets - Screen ကို unlock မလုပ်ဘဲ ဘယ်ဘက်ကို swipe လိုက်ရင် ကင်မရာဖွင့်ပေးပြီးတော့ ညာဘက်ကို ဆွဲရင် calendar/clock/gmail/messaging တစ်ခုခု ချက်ချင်းဖွင့်လို့ရအောင် configure လုပ်လို့ရလာတယ်။ တွေ့သမျှ မလွတ်တမ်း ဓါတ်ပုံရိုက်ယူထားလို့ရအောင်နေမယ်။ :D


၈။ Developer Options - Android 4.2 မှာ ဂူဂယ်က Developer Options ကို hide လုပ်ထားပါတယ်။ USB debugging ရှာမတွေ့လို့ လန့်သွားတယ်။ နောက်မှ နည်းတွေ့ပါတယ်။ Setting->About phone ကိုသွားပါ။ အောက်ဆုံးထိ scroll လုပ်ပါ။ Build number ကိုတွေ့ရင် ၇ကြိမ်တိတိ tap လုပ်ပေးမှ ဖုန်းဟာ developer ဖုန်းဖြစ်သွားပြီး Developer Options ပြန်ပေါ်လာပါမယ်။
ref: http://howto.cnet.com/8301-11310_39-57549207-285/restore-the-developer-options-menu-in-android-4.2/


၉။ Jelly Bean Easter egg - Settings->About phone ကနေ Android version ကို ဆက်တိုက် tap လုပ်ပေးရင် Android ဗားရှင်းထဲမှာ ဖွက်ထားတဲ့ Easter ထွက်လာတယ်ဆိုလို့ tap ကြည့်ရသေးတယ်။ Android 2.3 (Gingerbread) ကတည်းကစပြီး Easter egg တွေ ထည့်ထားတယ်ဆိုပေမယ့် ခုမှ သတိထားမိတယ်။ Android 4.2 မှာကြတော့ Jelly Bean Easter Egg လေးထွက်လာရင် ၅စက္ကန့်လောက် ဆက်ဖိထားရင် နောက်ထပ် bean တွေအများကြီး ထပ်ထွက်လာတယ်။ Beanflinger လို့ခေါ်တယ်တဲ့။ 

၁၀။ Daydream - Settings ထဲက Display အောက်မှာ Daydream ဆိုတဲ့ feature အသစ် ပါလာတယ်။ ကွန်ပျူတာ screen saver လိုမျိုး။ 

၁၁။ Multi-user login on tablets: tablet ကို လူအများကြီး ရှဲသုံးလို့ရပြီလို့ ဆိုတယ်။ ဖုန်းတွေမှာ မပါဘဲ tablet မှာဘဲ ပါတဲ့အတွက် စမ်းကြည့်လို့ မရတော့ ဘယ်လိုလည်း သေချာမသိ။  
၁၂။ December bug - Contacts add လုပ်တဲ့အခါ မွေးနေ့တို့ anniversary တို့ ထည့်မယ်ဆို December ပျောက်နေတယ်။ ဘယ်ကဘယ်လိုများ ဒီဇင်ဘာ တစ်လလုံး ချန်ခဲ့ရသလဲ မသိဘူး။ အဲဒီအတွက် နောက် update မကြာခင်တော့ ထုတ်ရဦးမယ်နေမယ်။  သူငယ်ချင်းတစ်ယောက်ပြောတာတော့ ဒီဇင်ဘာ၂၁ မှာ ကမ္ဘာမပျက်ဘူးဆိုမှ bug fix ထုတ်ပေးမလားမသိဘူးတဲ့။ :D 
(**update: December bug solved in 4.2.1 update)

Android ဗားရှင်းအသစ် release လုပ်တိုင်း အရင်ဆုံးရတဲ့အတွက်တော့ Nexus ဖုန်း ဝယ်ထားရတာ တော်တော်တန်သွားတယ်။ LG ရဲ့ Nexus 4 လိုချင်တာ ခုဖုန်းကလည်း တော်တော်ကောင်းနေသေးတယ်။ နောက်ထပ် Nexus အသစ်ထွက်မှဘဲ လဲတော့မယ်။ 

Ref:
- http://www.android.com/whatsnew/ 
- What’s New in Android 4.2 Jelly Bean (Wired.com)


Penang Trip - 1

ပီနန်တံတား 

Raya Haji ပိတ်ရက်သုံးရက်မှာ သူငယ်ချင်းတွေနဲ့ ပီနန်ကို သုံးရက်၂ည ခရီး သွားဖြစ်ခဲ့တယ်။ ပီနန်သွားဖို့စီစဉ်တာ သုံးလေးခါလောက်ရှိပြီ။ နီးမှ အကြောင်းကြောင်းကြောင့် ပျက်သွားတာချည်း။ ဒီတစ်ခေါက်တော့ ကြိုမစီစဉ်ထားဘဲ တစ်ပါတ်လောက်အလိုမှ သွားကြရအောင်ဆိုပြီး ဘတ်စ်ကားလက်မှတ် ကောက်ဝယ်၊ ဟိုတယ်ဘွခ်လုပ်မှဘဲ သွားဖြစ်တော့တယ်။

ဘတ်စ်ကားလက်မှတ်ကို ticket4u.com.my ကနေ ဝယ်လိုက်တယ်။ ကေအယ်လ်ပီနန် အသွားအပြန် တစ်ယောက်ကို ရင်းဂစ် ၇၀ ကျော်ကျော်ဘဲ ကျတယ်။ ဟိုတယ်ကို booking.com ကနေ book လုပ်တယ်။ လေးယောက်ခန်း ၂ညကို ၂၉၆ ရင်းဂစ်။ အဲဒီထက် စျေးသက်သာတဲ့ ဟိုတယ်တွေ၊ ဒီစျေးနဲ့ ဒီထက်ကောင်းတဲ့ဟိုတယ်တွေ ရှိပေမယ့် ဒီတစ်ခုက သွားရလာရ အချက်အချာ တော်တော်ကျလို့ New Asia Heritage Hotel ကိုဘဲ ရွေးလိုက်တယ်။

တစ်ယောက်မှ ပီနန်မရောက်ဖူးတော့ မသွားခင် ကြိုပြီး ဘယ်သွားမယ်၊ ဘာစားမယ်၊ ဘာလုပ်မယ်ဆိုတာ ကြိုတင် အိမ်စာလုပ်ရတယ်။ ပထမဆုံး ကိုတီဇက်အေရဲ့ Penang Trip အပိုင်း ၈ပိုင်း ကို ကျေညက်အောင် အပြန်ပြန် အလှန်လှန် ဖတ်တယ်။ :D Google Maps ကနေ နေရာတွေ၊ လမ်းတွေကို သေသေချာချာ လေ့လာမှတ်သားတယ်။ ဘလော့တွေ လိုက်ရှာဖတ်တယ်။ ဒေါင်းလုတ်လုပ်စရာရှိတာတွေလုပ်တယ်။

ပထမဆုံး ပြဿနာက သွားမယ့် ဘတ်စ်ကားဂိတ်။ အသိတွေကို မေးတယ်။ ဂူဂယ်လ်မှာရှာတယ်။ ဘယ်သူမှ နေရာအတိအကျ မညွန်းပေးနိုင်ဘူးဖြစ်နေတယ်။ အဲဒီနေ့မှ ကြည့်ကြပ်လုပ်ကြမယ်ဆိုပြီးထားလိုက်တာ ဘတ်စ်ကား မလွတ်သွားတာဘဲ ကံကောင်း။ တစ်ခြားဘတ်စ်ကားတွေအကုန်က အဓိက Terminal တွေဖြစ်တဲ့ Puduraya, Pekeliling Express Bus Terminal, TBS ကနေ ထွက်ပေမယ့် Plusliner နဲ့ Nice ကုမ္ပဏီ ၂ခုက KTM old railway station ကနေ စီးရတယ်။ Pasar Seni LRT station ကနေ တံတားကို ဖြတ်လိုက်ရင်ရောက်တယ်ဆိုတော့ ရှာရလွယ်မှာပါ ထင်ထားတာ။ တကယ်သွားမယ့်မနက်ကြမှ ဒုက္ခလှလှတွေ့ရော။ ဟိုလူမေး ဒီလူမေးနဲ့။ တံတားဖြတ်လိုက်ရင် ရောက်တယ်ဆိုပေမယ့် တံတားလည်းဖြတ်ပြီးရော ဆင်းဖို့ လှေကားက အများကြီး ဘယ်ကဆင်းရမှန်းမသိ၊ ထပ်မေးရပြန်ရော။ ၁၀နာရီ ဘတ်စ်ကားထွက်မှာ ဂိတ်ကို ၁၀မိနစ်နောက်ကျမှ ရောက်သွားတယ်။ ဘတ်စ်ကားဆရာက ကားတောင်စက်နှိုးနေပြီ။ မနည်းလိုက်တားပြီး အနောက်က လိုက်လာတဲ့ မရွှေချော သုံးယောက်ကို စောင့်ရတယ်။ အရင်ခေါက် စင်ကာပူသွားတုန်းက ငါးမိနစ်လေးနောက်ကျတာကို ဘတ်စ်ကားတစ်ခေါက် လွတ်သွားဖူးတော့ တော်တော်ကြောက်နေတာ။ ကားပေါ်ရောက်မှဘဲ သက်ပြင်းချနိုင်တော့တယ်။ 



လက်မှတ်ဝယ်ထားတုန်းက ခုံက အနောက်နားမှာပေမယ့် နောက်ကျမှရောက်သွားပြီး လူတွေက ထိုင်ချင်သလိုထိုင်နေကြတော့ လွတ်တဲ့ခုံ ဝင်ထိုင်လိုက်ရတယ်။ ကံကောင်းစွာနဲ့ double-decker bus ရဲ့ အပေါ်ထပ် ရှေ့ဆုံးခုံမှာရတယ်။ မလေးရှားမှာက မြန်မာပြည်လောက် သစ်ပင်မခုတ်တော့ တစ်လမ်းလုံး တောတွေ တောင်တွေက စိမ်းစိမ်းလန်းလန်း ရှိသေးတယ်။ ဘိလပ်မြေစက်ရုံတွေနားမှာတော့ တောင်တွေ ဖြိုထားတယ်။

လမ်းမှာ အစားအသောက် ဝယ်လို့ရမယ်ထင်ပြီး မနက်က ဘာမှ မစားခဲ့တာ မှားသွားတယ်။ ကားရပ်နားစခန်း သေးသေးတစ်ခုမှာ မိနစ် ၂၀လောက်ဘဲ ရပ်ပေးတယ်။ ဗိုက်ကတော့ တော်တော့်ကို ဆာနေပေမယ့် စားစရာကလည်း အသီးအနှံတစ်မျိုးဘဲရောင်းတော့ ရှိတာလေး ဝယ်စားပြီး ခရီးဆက်ခဲ့ရတယ်။ မနက်၁၀နာရီလောက် ကေအယ်လ်က ထွက်ခဲ့တာ နေ့လည် ၂နာရီခွဲလောက်မှာ ပီနန်ကျွန်းက Sg. Nibong Bus Terminal ကို ရောက်တယ်။ မြို့ထဲသွားမယ့်ဘတ်စ်တွေ ဒီ terminal ထဲထိ ဝင်ရပ်ပေးတယ်။ တည်းမယ့်ဟိုတယ်က Georgetown က Komtar နားမှာ။ တက္ကစီတွေက ရင်းဂစ်၂၀တောင်းတယ်။ ဘတ်စ်ကားနဲ့ဆိုရင် ၁ကျပ်ပြားလေးဆယ်။ မိနစ်၂၀လောက်နဲ့ Komtar ကိုရောက်တယ်။ ရောက်တာနဲ့ ဟိုတယ် check-in မလုပ်ခင် 1st Avenue Mall ထဲဝင်ပြီး နေ့လည်စာ အရင်စားရတယ်။ 

ပီနန်ကျွန်းက တော်တော်လေးကို tourist-friendly ဖြစ်ပါတယ်။ တိုးဂိုက်တွေဘာတွေမလိုဘဲ ဒီတိုင်းလျှောက်သွားလို့ရတယ်။ ဘတ်စ်ကားတွေလည်း အချိန်မှန်မှန်ဆွဲတယ်။ တက္ကစီတောင် သိပ်စီးဖို့ မလိုဘူး။ ၂ညအိပ် သုံးရက်အတွင်း ရောက်ဖြစ်ခဲ့တဲ့ နေရာတွေကတော့ 


Day 1
- Fort Cornwillis ခံတပ်, Penang Esplanade, Penang City Hall
- Gurney Drive ဟော်ကာစင်တာ
Day 2
- ပီနန်တောင်, Kek Lok Si ဘုရားကျောင်း
- Batu Ferringi ကမ်းခြေ၊ ညစျေး
- Koo Kongsi Festival of lights
Day 3
- Penang Toy Museum
- Heritage walk around the town
- A search for Penang street arts
ဖြည်းဖြည်းချင်း အသေးစိတ် ရေးသွားပါမယ်။ :)


A long weekend with lots of food and Yakju

ခေါင်းစဉ်ဖတ်ပြီး မူးသွားပြီလား? စာဖတ်ပြီးရင် ပိုမူးသွားဖို့ရှိတယ်။ hee :D

သောကြာနေ့က မလေးရှားနိုင်ငံရဲ့ လွတ်လပ်ရေးနေ့ (မာဒေးကား)ဆိုတော့ ရုံးပိတ်တဲ့အတွက် စနေတနင်္ဂနွေ နဲ့ဆက်သွားပြီး ပိတ်ရက်သုံးရက်ဖြစ်သွားတယ်။ ခါတိုင်း ပိတ်ရက်ဆို အချိန်က ဘယ်လိုကုန်သွားမှန်း မသိနိုင်အောင် အချိန်မလောက်ဖြစ်ပေမယ့် ဒီသုံးရက်ကြတော့ အလွန့်အင်မတန်ကို ရှည်လျားလွန်းသွားတယ်။ သူငယ်ချင်းတွေ တော်တော်များများ မြန်မာပြည်ပြန်နေတော့ အပြင်မထွက်ဖြစ်တော့ဘူး။ သုံးရက်စာ စားစရာကလည်း ရှိနေတော့ စျေးလေးတောင် မသွားဖြစ်ဘူး။ ပထမတစ်ရက်ကတော့ အိမ်ရှင်မကြီးပီပီ နှစ်ပါတ်လောက်ပစ်ထားတဲ့ အိမ်ကို သန့်ရှင်းရေးလုပ်ရတယ်။ သုံးလလောက် ပစ်ထားတဲ့ ရေခဲသေတ္တာကို defrost လုပ်ရတယ်။ freezer compartment ရဲ့ တစ်ဝက်နီးနီးလောက် ရေခဲတွေ ဖြစ်နေတာ :D ပြီးတော့ ကြမ်းတိုက် အဝတ်လျှော်၊ ဖတ်ဖတ်ကိုမော။ 
.
နေ့တိုင်းလိုလို နေ့တစ်ဝက်လောက်အိပ်တယ်။ ဟင်းချက်တယ်၊ စားတယ်၊ ဘာလုပ်ရမလဲစဉ်းစားတယ်။ ကျောက်ကျောမှုန့်ရယ် အုန်းသီးမှုန့်ရယ်တွေ့တော့ ကျောက်ကျောကျိုတယ်၊ စားတယ်။ ကြာဇံချက်တယ်၊ စားတယ်။ ပျင်းနေသေးတယ်။ ကြက်ဥတွေတွေ့တော့ ပူတင်းဖုတ်တယ်။ (pudding caramel လို့ရှာရင် custard နဲ့ recipe တွေဘဲထွက်လာတယ်။ နောက်ဆုံးမှ Flan လို့ခေါ်မှန်းသိတယ်။) ဘာဘဲဖြစ်ဖြစ် သူများလုပ်တာဘဲ ဘေးကနေလိုက်ကြည့်တာနဲ့စာရင် ကိုယ့်ကိုယ် လုပ်တတ်သွားတယ်။ သကြားဖြူဖြူကနေ ညိုမှ ညိုလာပါ့မလားလို့ ရင်တထိတ်ထိတ်နဲ့ မွှေလိုက်ရသေးတယ်။ အညိုလွန်သွားပြီး နည်းနည်း တူးချင်ချင် ဖြစ်သွားတယ်။ ကြက်ဥ၊ နွားနို့၊ နို့ဆီ၊ နို့စိမ်း ရောမွှေပြီး ခွက်လေးတွေထဲလောင်းချ၊ oven ထဲ ထည့်ဖုတ်၊ တော်တော်စားကောင်းတယ် :D 
.
ဒီနေ့မနက်က အဖေ့ရဲ့ recipe နဲ့ နကထိုင် စမ်းလုပ်ကြည့်တယ်။ အိမ်မှာ အမြဲ ဘေးကကြည့်နေတော့ ငါလုပ်တတ်ပြီလို့ထင်ပေမယ့် လုံးဝ တစ်လွဲ ထွက်လာတယ်။ မွမွလေးဖြစ်ရမှာကို ကျစ်ကျစ်ကြီး ဖြစ်နေတယ်။ နကထိုင်လုပ်တာ ဘီစကစ်နီးနီး ဖြစ်သွားတယ်။ စားလို့တော့ကောင်းတယ် :D အပေါ်ကရေးတာတွေက တစ်ရက်တည်းစားတာ မဟုတ်ဘူးနော်။ သုံးရက်စာပေါင်းရေးလိုက်တာ။ သုံးရက်အတွင်း အစား တော်တော်စုံသွားတယ်။ ခုတလေ မEvy ရဲ့ ဘလော့ဂ်ကို ဖတ်ဖတ်ပြီး မုန့်ဖုတ်တာ ဓါတ်ကျနေတယ်။ Apple Muffin နဲ့ butter cake စမ်းလုပ်ကြည့်တယ်။ နည်းနည်းတော့ လွဲနေသေးပေမယ့် စားလို့တော့ ဖြစ်တယ်။
.
သေချာပြန်စဉ်းစားကြည့်လိုက်တော့ ထောပါတ် ၂၀၀ဂရမ်တစ်တုံးဝယ်ထားတာကို မုန့်လုပ်ပြီး စားပစ်တာ တစ်ပါတ်အတွင်းကုန်သွားတယ်။ ဗိုက်ထဲဝင်သွားတဲ့ အဆီတွေ၊ ကိုလက်စထရောတွေ တွေးကြည့်ရင် မနည်းမနောဘဲ။ ဒီတိုင်းဆက်စားနေရင်တော့ တော်တော်ဝလာလိမ့်မယ်။ personal ပို့စ်တွေ သိပ်ရေးလေ့မရှိပေမယ့် ဒီနေ့က အလွန့်အင်မတန် ပျင်းနေပြီး တစ်ခုခု ရေးချင်စိတ် ပေါက်သွားတယ်။
စားတယ်၊ သောက်တယ်၊ မုန့်လုပ်တယ်၊ ဟင်းချက်တယ်၊ မြန်မာကားကြည့်တယ်၊ ကိုးရီးယားဇာတ်လမ်းတွဲ Gumiho ပြီးသွားတယ်။ အင်္ဂလိပ် စီးရီးစ် “New Girl” season 1 လည်း ပြီးသွားတယ်။ ဆက်ကြည့်စရာ ရုပ်ရှင်လည်းကုန်ပြီ၊ မုန့်လုပ်လို့လဲဝပြီ။ လူက ပျင်းနေတုန်းဘဲ။ အဲဒီလို တစ်အားပျင်းပြီး လုပ်စရာမရှိတော့မှ Galaxy Nexus ဖုန်းကို yakju ROM flash လုပ်ဖို့ စိတ်ကူးပေါက်လာတယ်။ 

လုပ်မယ် လုပ်မယ်နဲ့ အပျင်းကြီးနေတာ ငါးလကျော်သွားပြီ။ yakju တို့ yakjuxw တို့ takju တို့ဆိုတာက Galaxy Nexus အတွက် official ROM (factory image) တွေရဲ့ နာမည်တွေပါ။ အစက အမှုမဲ့ အမှတ်မဲ့ပါဘဲ။ official update ထွက်တိုင်း သူငယ်ချင်းတစ်ယောက်က အရင် ရရနေပြီး သူ့ဖုန်း update ရပြီး တော်တော်ကြာမှ သဉ္ဇာ့ဖုန်း update ရပါတယ်။ Google ကပေးတဲ့ official update တွေကို တစ်ခြားဖုန်းတွေထက် အရင်ရချင်လို့ Galaxy Nexus ဝယ်ထားပါတယ်ဆို ခုဟာက ဖုန်းချင်းအတူတူ (သူတောင် နောက်မှဝယ်တာကို) update ကြတော့ ခွဲခြား ခွဲခြား လုပ်ခံရတော့ စိတ်မရှည်တော့ဘူး။ :D နည်းနည်းပါးပါး Google လိုက်မှ ကိုယ့်ဖုန်းက yakjuxw ဖြစ်နေပြီး သူငယ်ချင်းဖုန်းက yakju ဖြစ်လို့ update ထွက်တိုင်း သူအရင်ရနေတာ။


Takju vs Yakju vs Yakjuxw
Galaxy Nexus အတွက် Google ကထုတ်တဲ့ Factory Image က Yakju လို့ခေါ်ပါတယ်။ Yakju မှာ Google Wallet ပါတစ်ခါတည်း ထည့်ထားရင် Takju ဖြစ်သွားပြန်ပါတယ်။ Yakju နဲ့ Takju ROM ပါတဲ့ ဖုန်းတွေက Google ကနေ update ထုတ်တိုင်း Google Server ကနေ တိုက်ရိုက် ရပါတယ်။ သို့ပေမယ့် Samsung က အဲဒီ yakju ကို ယူ၊ localized setting ဘာညာသာရကာလေး ပေါင်းထည့်ပြီး ပြန်ဖြန့်တော့ yakjuxw ဖြစ်သွားတယ်။ အဲဒီတော့ကာ Google ကထုတ်တဲ့ update က local Samsung branch ကို အရင်ရောက်မယ်။ အဲကနေတဆင့် ထည့်ချင်တာတွေထပ်ပေါင်းထည့်ပြီးမှ centralize ဆာဗာမရှိတော့ telco တွေကို ပို့တယ် (တစ်ခြားနိုင်ငံတော့ မသေချာပါ။ မလေးရှားမှာတော့ အဲလို။) ပုံမှန်ကြာချိန်ထက် အနည်းဆုံးတစ်လလောက် ပိုကြာသွားပါတယ်။ ကံကောင်းချင်တော့ yakjuxw ဖုန်းတွေကို yakju ROM flash လုပ်ဖို့ နည်းလမ်းဖတ်လိုက်မိပါတယ်။ အဲဒါကို ပြောင်းမယ်ပြောင်းမယ်လုပ်နေတာ ခုလို အလွန့်အလွန် အားမှဘဲ ပြောင်းဖြစ်သွားတယ်။ 


ဒီ Easiest Way to Change Galaxy Nexus from Yakjuxw (Non-Yakju) to Android 4.1.1 Yakju/Takju ဆိုတဲ့ article တော်တော် ပြည့်စုံ ပြီး ရှင်းပါတယ်။ သူများတွေ step-by-step သေချာရေးပေးထားတာကို လိုက်လုပ်တာတောင် နည်းနည်းကြာသွားတယ်။ ဖုန်းကတော့ ခုမှ သန့်ရှင်းသွားတယ်။ အစက တွေ့သမျှ apps တွေသွင်းထားတော့ home screen ငါးမျက်နှာက icon တွေ လုံးဝအပြည့်။ app တစ်ခုခုဆို မနည်းတောင် ရှာယူရတယ်။ uninstall တွေ လုပ်ဖို့လိုနေပေမယ့် မလုပ်ဖြစ်နေတာ။ ခုတော့လည်း လုံးဝကို ပြောင်ရှင်းသွားရော။ မနည်းပြန်သွင်းရမယ်။ Jelly Bean OTA လည်းရပြီ။ Wifi network တောင်းနေလို့ နက်ဖြန် ရုံးရောက်မှဘဲ သွင်းရတော့မယ်။ တနင်္ဂနွေနေ့မှာ တနင်္လာ ရောက်ချင်တာ ဒီတစ်ခေါက်ဘဲ ရှိဖူးသေးတယ်။ နက်ဖြန် မိုးရွာမလားမသိဘူး :D


Near Field Communication (NFC)

NFC ဆိုတာ
မကြာမှီ နှစ် အနည်းငယ် အတွင်းမှာ လက်ကိုင်ဖုန်းတစ်လုံးဟာ သင့်ရဲ့ ပိုက်ဆံအိတ်၊ credit card တွေရဲ့ နေရာမှာ အစားထိုးဝင်ရောက်လာမယ်၊ လက်ကိုင်ဖုန်းကို tap လိုက်တာနဲ့ လိုချင်တဲ့ သတင်းအချက်အလက်တွေ ရစေမယ့် နည်းပညာတစ်ခုကတော့ Near Field Communication (NFC) ပါဘဲ။ NFC ဟာ ကြိုးမဲ့ ဆက်သွယ်ရေးစနစ် (wireless technology) တွေထဲက တစ်ခုဖြစ်ပြီး ခုနောက်ပိုင်းမှာ Android ရဲ့ NFC-support ကြောင့် ပိုပြီး ရေပန်းစားလာခဲ့ပါတယ်။

NFC ဟာ (short range wireless − အကွာအဝေးအတိုအတွင်းသာ အလုပ်လုပ်တဲ့ ကြိုးမဲ့ နည်းပညာ ဖြစ်ပြီးသီအိုရီအရတော့ ၁၀စင်တီမီတာ အကွာအဝေးအတွင်း အလုပ်လုပ်တယ်လို့ ဆိုပါတယ်။ ပုံမှန်အားဖြင့်တော့  ၁ မှ ၄ စင်တီမီတာအတွင်းသာ စွမ်းဆောင်ရည်ကောင်းပါတယ်။  13.56MHz အတွင်းမှာ operate လုပ်ပြီး communicatin protocol ရယ် data exchange format ရယ်က RFID (Radio Frequency Identification) ရဲ့ စံနှုန်းတွေကို လိုက်နာ ပါတယ်။ (RFID ကတော့ 125MHzလှိုင်းမှာ အလုပ် လုပ်ပါတယ်။) မြန်နှုန်း(speed) အနေနဲ့ကတော့ 106-414kbps သာ ရှိပါတယ်။

NFC နည်းပညာ ကို ဘယ်လိုနေရာတွေမှာသုံးလာကြမလဲ?

NFC chip ထည့်ထားသော ပိုစတာ၊ ပရိုမိုးရှင်း ကူပွန်နှင့် ရှော့ပင်းစင်တာ
(photo courtesy to original owners)

နေရာ NFC ဖုန်းနဲ့ tap လိုက်ရင်
ဘတ်စ်ကားမှတ်တိုင်မှာ ဘတ်စ်ကားအချိန်စာရင်း
ပြတိုက်မှာ ပြခန်းပစ္စည်းတစ်ခုရဲ့ အကျဉ်းချုပ် သို့မဟုတ် အကျယ်လေ့လာနိုင်တဲ့ website URL ကို တစ်ခါတည်း ဖွင့်ပေးမယ်။
ကုန်ပစ္စည်းကြော်ငြာ − ၄င်းကုန်ပစ္စည်းရဲ့ ဝက်ဘ်ဆိုဒ် သို့မဟုတ် ပရိုမိုးရှင်း ကူပွန်
free Wifi ဆိုတဲ့ sign wifi password ရှိခဲ့ရင် အော်တို authenticate လုပ်ပေးပြီး သင့်ဖုန်းကို အင်တာနက် ချိတ်ပေးမယ်။
ကုန်ပစ္စည်း/ ဝန်ဆောင်မှုလုပ်ငန်း ကိုယ့်ရဲ့ facebook page ကို အော်တို like စေမယ်။
အခြား NFC စွမ်းဆောင်ရည် ပါဝင်တဲ့
လက်ကိုင်ဖုန်း tablet အချင်းချင်း
ဓါတ်ပုံ၊ လိပ်စာကဒ်၊ သီချင်း၊ youtube link စသည်ဖြင့်…
check-in ဘယ်နေရာရောက်ရောက် check-in ကြတဲ့ခေတ်မှာ ရောက်နေတဲ့ နေရာကို တကူးတက ရှာစရာမလိုတော့ဘဲ tap လိုက်တာနဲ့ check-in လုပ်နိုင်တော့မှာပါ။
Mobile Payment Paypal ကလည်း သူ့ရဲ့ commercial NFC service ကို UK မှာ စတင် launch လုပ်ထားပါတယ်။ Google ကလည်း Google Wallet ဆိုတဲ့ application ကို ထုတ်လုပ်ခဲ့ပြီး credit card ကို NFC ဖုန်းကနေတဆင့် သုံးနိုင်အောင် လုပ်ထားပါတယ်။ (ICS ဖုန်းတိုင်းတော့ သုံးလို့ မရသေးပါဘူး။ yakju နဲ့ takju build ဖုန်းတွေဘဲ သုံးလို့ ရဦးမှာပါ။)

Android နှင့် NFC

NFC ကို စသုံးခဲ့တာ Android မဟုတ်ပေမယ့် Android ကြောင့် NFC က ပိုအသုံးဝင်လာခဲ့တယ်လို့ ဆိုနိုင်ပါတယ်။ (နိုကီယာ ဖုန်းတော်တော်များများမှာ NFC ထည့်သွင်းထားတာ တွေ့ရပေမယ့် developer အတွက် API ကောင်းကောင်းမရှိတော့ သိပ် အသုံးတွင်ကျယ်ဟန် မရပါဘူး။ iOS မှာတော့ iPhone 4S ထိ NFC support ပါမလာသေးပါဘူး။ iOS6 မှာ ထည့်သွင်းလာမယ်လို့ ခန့်မှန်းကြပါတယ်။) Android 2.3, Gingerbread မှာစပြီး NFC support ထည့်သွင်းခဲ့ပြီး ပထမဆုံး NFC-enabled Android ဖုန်းကတော့ Google ရဲ့ Nexus S ဖြစ်ပါတယ်။ ဒါပေမယ့် စစချင်းမှာ NFC tag တွေကို ဖတ်နိုင်တဲ့ စွမ်းဆောင်ရည်ဘဲ ပါလာသေးပါတယ်။ Android 2.3.3 မှာမှ NFC read/write နည်းပညာ စတင်မိတ်ဆက်ခဲ့ပါတယ်။ Android 4.0 နဲ့ ပထမဆုံးထွက်လာတဲ့ Galaxy Nexus ဖုန်းမှာတော့ “Android Beam” ဆိုတဲ့ technology ကို စတင်ထည့်သွင်းခဲ့ပါတယ်။ Android beam ကြောင့် NFC ပါတဲ့ ဖုန်းအချင်းချင်း data sharing လုပ်လို့ရနိုင်လာပြီး data format ကို NDEF message လို့ခေါ်ပါတယ်။ data ဆိုတဲ့နေရာမှာ ဓါတ်ပုံ၊ သီချင်း၊ လိပ်စာကဒ်၊ Google Play URL, youtube URL, website URL စသဖြင့်ပါဝင်ပြီး ဖုန်းရဲ့ ကျောဘက်ချင်း tap(ထိ) လိုက်တာနဲ့ share လုပ်လို့ရပါတယ်။ Sony Xperia SmartTags ဆိုတဲ့ ကြော်ငြာကိုကြည့်ရင် Sony ရဲ့ XperiaS နဲ့အတူ NFC ကို တွင်တွင်ကျယ်ကျယ် မိတ်ဆက်လာတာကို တွေ့ရမှာပါ။

NFC chips/ NFC stickers/ NFC tags


နမူနာ NFC chips/stickers/tags များ
NFC အသုံးပြုတဲ့နေရာမှာ active target နဲ့ passive target ဆိုပြီး နှစ်မျိုးရှိပါတယ်။ NFC chip ထည့်သွင်းထားတဲ့ smartphone/tablet/otherdevices တွေဟာ Active target တွေပါ။ Passive target ကတော့ NFC sticker တို့ NFC tags တို့ပေါ့။ Android 2.3.3 ကနေစပြီး NFC write support ပါလာတဲ့အတွက် ဖုန်းကို အသုံးပြုပြီး NFC tags/sticker တွေကို read/write လုပ်လို့ရပါပြီ။ Tags နဲ့  sticker တွေက rewritable ပါ။ read-only ဖြစ်အောင် lock လုပ်လို့ရပါတယ်။ တစ်ခါ lock ပြီးတာနဲ့ ပြန် unlock လုပ်လို့မရတော့တာကိုတော့ သတိထားပါ။ Samsung ဖုန်းတွေမှာ NFC chip ကို ဘက်ထရီနဲ့ တွဲလျက် ထုတ်ပြီး LG ကတော့ back cover မှာ NFC chip ကို ထည့်ထားပါတယ်။ ကျမလည်း ဘက်ထရီနဲ့ တွဲထုတ်ထားတာကို သဘောမကျလှပါဘူး။ ဘက်ထရီလဲချင်တဲ့အချိန်ကြရင် ဒုက္ခရောက်ပါတယ်။ 

NFC နှင့် ဖုန်းလုံခြုံရေး အန္တရာယ်

NFC နည်းပညာ အသုံးပြုတာ တွင်ကျယ်လာတဲ့အခါ နောက်ဆက်တွဲ ပါလာနိုင်မယ့် အန္တရယ်တွေကိုလည်း သတိပြုသင့်ပါတယ်။ ဖြစ်နိုင်တာတွေကတော့ 

၁။ Eavesdropping − ကြားထဲကနေဖြတ်ပြီး ဒေတာခိုးယူမှု ဖြစ်လာနိုင်တယ်။ 

၂။ Data Manipulation − အလယ်ကနေဖြတ်ပြီး ဒေတာတွေ ပြောင်းပစ်နိုင်တယ်။ စိတ်ကြိုက် ခြယ်လှယ်နိုင်တယ်။ 
၃။ NFC ဖုန်းတွေဆီ ဗိုင်းရပ်စ် ဖြန့်ရတာ ပိုမို လွယ်ကူလာမယ်။ 
၄။ ဖုန်းပျောက်သွားခဲ့မယ်ဆိုရင် မိမိရဲ့ credit card information ပါတစ်ခါတည်း ပါသွားနိုင်တယ်။ 

ဒါတွေမယ့် အပေါ်မှာ ပြောသွားတဲ့ အန္တရယ်တွေကို ကာကွယ်နိုင်တာ မိမိကိုယ်တိုင်ဘဲ ဖြစ်ပါတယ်။
၁ နဲ့ ၂ အတွက်ကတော့ NFC ဟာ ၅စင်တီမီတာလောက်အတွင်းမှာသာ အလုပ်လုပ်တဲ့အတွက် သေချာ ဂရုတစိုက် သတိထားရင် အခြားသူတွေ ကြားဖြတ်ပြီး ဒေတာခိုးယူတာ/ ခြယ်လှယ်တာတွေ မဖြစ်နိုင်တော့ပါဘူး။
၃။ မိမိ စိတ်မချတဲ့ NFC target တွေကို tap မလုပ်ဘူးဆိုရင် virus ကူးတာကနေ ရှောင်ရှားနိုင်မှာပါ။ ဖုန်းထဲမှာ anti-virus တစ်ခုခု သွင်းထားပါ။ 
၄။ NFC ဟာ ဖုန်းရဲ့ screen lock ဖြစ်နေရင် အလုပ်မလုပ်ပါဘူး။ screen ကို ဖွင့်လို့မရရင် credit credit/Google Wallet တွေ သုံးနိုင်မှာ မဟုတ်ပါဘူး။ ဒီတော့ screen unlock အတွက် password-protect/pattern lock လုပ်ထားသင့်ပါတယ်။

NFC ကို စမ်းသပ်ခြင်း 


NFC tags from tagsfordroid
Galaxy Nexus မှာ NFC support ပါလာတော့ Nexus သုံးတဲ့ အခြားသူငယ်ချင်းတစ်ယောက်နဲ့ အတူ စမ်းသပ်ကြည့်ဖို့ www.tagsfordroid.com ကနေ NFC tags ၁၀ခုကို ပို့ခအပါအဝင် US$ 20နဲ့ မှာလိုက်ပါတယ်။ ကံကောင်းချင်တော့ တစ်ပါတ်အတွင်းရပါတယ်။ စမ်းသပ်ထားသလောက်တော့

၁။ ဖုန်းအချင်းချင်း Android beam နဲ့ contact sharing လုပ်ကြည့်ပါတယ်။ ဖုန်း၂ခုလုံး NFC ဖွင့်၊ ဖုန်းတစ်ခုက share ချင်တဲ့ contact ကိုဖွင့်ပြီး နောက်ဖုန်းတစ်ခုကို ကျောဘက်ချင်း tap လုပ်လိုက်တဲ့အခါ ဟိုဘက်ဖုန်းထဲကို contact card/business card တစ်ခုလုံး share ပြီးသား ဖြစ်သွားပါတယ်။
၂။ Youtube app ကနေ ဗီဒီယိုတစ်ခု ဖွင့်ထားပြီး အခြားဖုန်းကို tap လိုက်ရင် သူ့ဖုန်းထဲမှာ အဲဒီ ဗီဒီယိုကို အလိုအလျောက် ဖွင့်ပေးပါတယ်။
၃။ Game တစ်ခု ကစားနေတဲ့အချိန် နောက်ဖုန်းတစ်ခုကို tap လိုက်ရင် သူ့ဆီမှာ အဲဒီgame ရှိခဲ့ရင် တစ်ခါတည်း ဖွင့်ပေးပြီး မရှိခဲ့ရင် Google Play ကို တစ်ခါတည်း ခေါ်သွားပါတယ်။
၄။ Google Play ကနေ NFC Quick Actions ဆိုတဲ့ app ကို သွင်းပြီး tags တွေကို စမ်းရေးကြည့်ပါတယ်။ Application, ဖုန်းနံပါတ်, foursquare check-in location, ကင်မရာ flash မီးအဖွင့်အပိတ်, အီးမေးလ်, sms, Google maps, maps navigation, settings, plain text, website URL, Wifi hotspot+password စသဖြင့် အစုံရေးလို့ရပါတယ်။ ကျမတို့ မှာထားတဲ့ tags က မမ်မိုရီ 768 bytes ရှိပါတယ်။ tags တစ်ခုနဲ့တစ်ခု ရေးလို့ရတဲ့ memory ကွာပါတယ်။ မဝယ်ခင် သေချာစစ်ပါ။ tag တစ်ခုကို business card လုပ်ထားပါတယ်၊ အခြား tag တွေကိုတော့ settings ထည့်ရေးထားပါတယ်။ ဥပမာ− ရုံးမှာထားတဲ့တစ်ခုက ဖုန်းအသံလျော့တယ်၊ vibrate on တယ်၊ wifi ဖွင့်ပါတယ်။ tap လိုက်တာနဲ့ ကိုယ်ထည့်ရေးထားတဲ့ settings အကုန်လုပ်ပေးသွားမှာပါ။ 

NDEF message တွေ ဘာတွေကိုတော့ သေချာ မလေ့လာရသေးပါဘူး။ အရင်နှစ် Google I/O မှာ ပြောသွားတဲ့ How to NFC ကိုလည်း စိတ်ဝင်စားရင် ကြည့်သင့်ပါတယ်။ တော်တော်ပြည့်ပြည့်စုံစုံ ရှင်းပြသွားတာပါ။ Google Wallet app ကလည်း မလေးရှားအတွက် available မဖြစ်သေးတော့ စမ်းကြည့်လို့မရပါဘူး။ Technical articles တွေ မရေးတာ ကြာတော့ ဒီတစ်ပုဒ်ရဖို့ တော်တော် ရေးယူလိုက်ရပါတယ်။ LG Optimus 4X HD တို့ Sony Xperia S တို့ဝယ်ရင် NFC tags လေးတွေပါ တစ်ခါတည်း ပေးတယ်လို့တော့ ဖတ်ရတယ်။ S3 ရဲ့ feature တစ်ခုဖြစ်တဲ့ S-Beam ဆိုတာလည်း NFC ပါ။   နောက်ထွက်တဲ့ ဖုန်းတွေတော့ အားလုံးနီးပါး NFC support လုပ်လာလောက်ပါတယ်။ 

ကိုးကား။ ။
၁။ What is NFC and why do we care? (Engadget)
၂။ NFC Security Risk
၃။ Near Field Communication (Wikipedia)
၄။ Android API 2.3.3
၅။ Android API 4.0
၆။ List of NFC-enabled handsets (Wikipedia)


Handling Android screen orientation and splash screen

Sometimes, tiny little things can give the developer a big headache. I was developing a webview application to cater for both portrait and landscape layout. I created layout-land folder and create the same XML with webview there, but referencing to different splash screen image. The problem is, When I rotate, the app will restart. I tried to search thru stackoverflow for many hours, found this. Most of them suggested me to add "android:configChanges="orientation|screenSize"" in AndroidManifest like below.

            < android:name=".MyActivity"
            android:label="@string/title_activity_myactivity"
            android:configChanges="orientation|screenSize" android:screenOrientation="unspecified" >
But, my application target was 2.2 and it doesn't allow me to add "orientation" in "android:configChanges". Later, I changed the application to target 4.0, only then it works. The app won't restart anymore when the orientation changes. And overwrite the following method in the Activity.

//must override this, if not, screen orientation will make the app force close
    @Override
    public void onConfigurationChanged(Configuration newConfig) {
        // TODO Auto-generated method stub
        super.onConfigurationChanged(newConfig);
    }
Some other things i learnt from my previous project:

1. To remove the title bar from the app (AndroidManifest.xml)

        android:icon="@drawable/ic_launcher"
        android:label="@string/app_name"
        android:theme="@android:style/Theme.NoTitleBar" >
2. the great splash screen example: Android Splashscreen done right

Normally, webview loading is a little slow. And if you create the splashscreen as a separate activity, it won't solve the problem of webview loading slow. The above example use "SplashDialog", which will load webview at the same time as the splashscreen.

*Note: the above orientation handling doesn't seem to work with jquery mobile


An unplanned visit to Batu Caves

သွားမယ်စီစဉ်တိုင်း မရောက်ဖြစ်တဲ့ Batu Caves ကို ဒီတစ်ခေါက်တော့ အစီအစဉ်မရှိဘဲ ဖြတ်သွားဖြတ်လာ လမ်းကြုံလို့ ဝင်လိုက်မှဘဲ ရောက်ဖြစ်တော့တယ်။ Batu Caves က ကွာလာလမ်ပူမြို့ရဲ့ tourist attraction တွေထဲက တစ်ခုအပါအဝင်ပါ။ နှစ်ပေါင်း သန်းလေးရာလောက် သက်တမ်းရှိတဲ့ ထုံးကျောက်ဂူထဲဖြစ်ပြီး အထဲမှာ Tamil လူမျိုး ဟိန္ဒူဘာသာဝင်တွေ တည်ထားကိုးကွယ်တဲ့ ဘုရားကျောင်း/နတ်ကွန်းတွေ ရှိတယ်။
တောင်ပေါ်မတက်ခင် ရင်ပြင်မှာ ပေ၁၄၀မြင့်တဲ့ ကမ္ဘာ့အကြီးဆုံး Lord Murugan ရုပ်တုကြီးကို အရင်တွေ့ရတယ်။ tourist attraction နေရာ မို့လားမသိဘူး။ အနီးအနားဝန်းကျင် တစ်ခုလုံး သန့်ရှင်းနေတာဘဲ။ ခိုစာကျွေးတဲ့ နေရာတွေရှိတော့ ရင်ပြင်ပေါ်မှာ လူတွေနဲ့ ယဉ်ပါးနေတဲ့ခိုလေးတွေ ဟိုတစ်စု ဒီတစ်စု တွေ့ရတယ်။
လှေကားကတော့ ဒီလိုမတ်တာ တစ်ဝက်မှာ နောက်ပြန်လှည့်ကြည့်ရင်တောင် ခေါင်းတွေမူးလာတယ်။

တောင်ပေါ်ကိုတက်ဖို့ လှေကား ၂၇၂ ထစ်ဆိုတော့ ၁၂ထပ်တိုက်ပေါ် တက်ရသလောက်တော့  မြင့်ပါလိမ့်မယ်။ သူ့လှေကားတွေက မတ်တော့ တက်ရတာ နည်းနည်းတော့ ပင်ပန်းတယ်။ သူငယ်ချင်းတွေနဲ့ စကားတပြောလိုက်၊ ဓါတ်ပုံရိုက်လိုက်နဲ့တက်တော့လည်း ခဏလေးနဲ့ ရောက်သွားသလိုဘဲ။ အဲနေ့က နေမပူလို့လဲပါမယ်။ နေပူကျဲတဲထဲဆို တက်သိပ်မလွယ်လောက်ဘူး။ ဘုရားကျောင်းလာတဲ့သူတွေတော့ ဖိနပ်ချွတ်ပြီး တက်ကြပေမယ့် ကျန်တဲ့သူတွေကို ဖိနပ်စီးတက်ခွင့်ပေးထားတယ်။
ဂူအတွင်းပိုင်း
ထုံးကျောက်ဂူက နှစ်သက်တမ်းကြာနေတာရယ် လူအလာများတာရယ်ကြောင့်ထင်တယ် သိပ်မလှတော့ဘူး။ ထုံးကျောက်ခက်ပန်းဆွဲတွေလည်း ပုံမလှတော့ဘူး။ ဂူပေါက်ဝနားပိုင်းလောက်ဘဲလှတယ်။ အထဲမှာလည်း နတ်ရုပ်တွေ သိပ်တော့မများဘူး။ ဂူကျယ်တာလည်းပါမယ်ထင်တယ်။ ဂူအမိုးကတော့ တော်တော်ြမင့်တယ်။ ဂူခေါင်မိုးက အပွင့်ဆိုတော့ မိုးရွာထားလို့ အထဲမှာ စိုရွှဲရွှဲဖြစ်နေတော့ ကြာကြာမနေတော့ဘဲ မြန်မြန်ပြန်ဆင်းခဲ့ကြတယ်။ အမှန်ဆို နည်းနည်းဆက်သွားပြီး ဘယ်နေရာမှာ ဆုံးသလဲ။ အထဲမှာ ဘာတွေရှိသေးလဲ ကြည့်ခဲ့ရမှာလို့ ခုမှပြန်စဉ်းစားမိတယ်။ နောက်တစ်ခေါက် လမ်းကြုံရင်တော့ ထပ်သွားကြည့်ချင်သေးတယ်။ နတ်ဘုရားရုပ်တုတွေကိုးကွယ်ထားတဲ့ main cave ကနေဆင်းရင် အဆင်းလမ်းတစ်ဝက်လောက်မှာ လမ်းခွဲသွားတဲ့နေရာမှာ "dark cave tour” ဆိုတာ တွေ့မိတယ်။ ၄၅မိနစ်ကြာ Educational Tour က တစ်ယောက်ကို 35 ရင်းဂစ်၊ ၂နာရီအကြာ Adventure tour က ရင်းဂစ် ၈၀၊ အနည်းဆုံး ငါးယောက် တစ်ဖွဲ့ထင်တယ်။ သေချာ ထိန်းသိမ်းထားတဲ့ ဂူရဲ့ အတွင်းပိုင်းတွေထိ သွားမယ့် Guided Tour ဆိုတော့ စိတ်ဝင်စားဖို့ကောင်းတယ်။ တစ်ခါလောက်တော့ သွားကြည့်ချင်တယ်။
အဆင်းလမ်းကိုကြည့်ရင် မူးတောင်မူးတယ်။

အတက်အဆင်းမှာ မျောက်အန္တရာယ်ကိုလည်း သတိထားရသေးတယ်။ တစ်လမ်းလုံး မုန့်လုဖို့ စောင့်နေတဲ့ မျောက်တွေ အများကြီးဘဲ။ လူကိုတော့ အန္တရာယ်မပေးဘူး။ဖုန်းတွေလွယ်အိတ်တွေ လုသွားမှာတော့ လန့်နေရတယ်။ ဓါတ်ပုံတောင် ဖြောင့်အောင် မရိုက်ရဲဘူး။ အဆင်းလမ်းမှာ ကလေးလေးတစ်ယောက် ဗြဲကနဲအော်ငိုတာ လှမ်းကြည့်လိုက်တော့ သူစားနေတဲ့မုန့်ကို မျောက်ကလုသွားတာကိုး။ သူ့အမေမှာ ငိုရအခက် ရယ်ရအခက်။ ကလေးကတော့ လန့်တာလား..သူစားနေတဲ့ မုန့်ကိုယူသွားလို့လားတော့ မသိဘူး။ ငိုနေတာ တော်တော်နဲ့ကို မတိတ်တော့ဘူး။ 

အောက်ဆင်းလာပြီး ရင်ပြင်တော်နားမှာ ပန်းခြံသေးသေးလေး လုပ်ထားသေးတယ်။ တစ်ယောက်ကို ရင်းဂစ်၇ကျပ် ဆိုတော့လည်း မဝင်ြဖစ်တော့ဘူး။ ရေကန်သေးသေး ငါးနည်းနည်းမွေးပြီး တောင်ပေါ်ထိမတက်နိုင်တဲ့သူတွေ အောက်မှာ အနားယူရအောင် စီးပွားရှာတတ်ပုံကိုလည်း ချီးကျူးမိတယ်။ 

တောင်ပေါ်ကဆင်းလာပြီဆိုတော့ နောက်ကြောင်းပြန်လိုက်ပါဦးမယ်။ :D အမှန် အဲနေ့မနက်က ဆလာရမ်းဆိုတဲ့ နေရာမှာ မနက်စာသွားစားတာ။ ဆလာရမ်းက မြန်မာအစားအစာ တော်တော်စုံစုံလင်လင်ရနိုင်တဲ့နေရာပါ။ ဘိန်းမုန့်ကအစ၊ အစုံသုပ်၊ အုန်းနို့ခေါက်ဆွဲထိ အစုံရပါတယ်။ မနက်စာစားရင်း weekend ၂ရက်လုံးစားဖို့ပါ ဟင်းဝယ်လာလိုက်တယ်။ ဘုရားလည်းဖူး လိပ်ဥလည်းတူး၊ ငါးလည်းမျှား ရေလည်းချိုးပြန်လုပ်ခဲ့တာ။ လမ်းကြုံလို့ batu caves ပေါ်ပါရောက်သွားတယ်ဆိုတော့ ပိတ်ရက်မှာ စောစောထရကျိုး နပ်သွားတယ်။ Selayang ကဝယ်ခဲ့တဲ့ ချဉ်ပေါင်ကြော်ရယ် ငါးကြော်ရယ်နဲ့ batu caves ခရီးစဉ်ကို နိဂုံးချုပ်လိုက်ပါတယ်။ :D


Nexus story

ဟိုးရှေးရှေး android ဖုန်းတွေ စခေတ်စားတုန်းကပေါ့ကွယ်။ Nexus One ကို အသည်းအသန်လိုချင်တဲ့ ကောင်မလေးတစ်ယောက်ရှိတယ်။ ဒါပေမယ့် မလေးရှားမှာ တော်တော်ရှာဝယ်ရခက်တဲ့အပြင် စျေးကလည်းများတော့ သူလက်လှမ်းမှီရာ HTC Hero နဲ့ဘဲ ကျေနပ်လိုက်ရတယ်တဲ့။ ဒါပေမယ့် နောက်ထပ်ဖုန်းတစ်လုံး ဝယ်ရင်တော့ Nexus ဖုန်းဘဲ ဝယ်မယ်လို့ ဆုံးဖြတ်ထားသတဲ့ကွယ်။ ကြားထဲမှာ Nexus S ထွက်ပေမယ့် မကြာခင်ဘဲ Galaxy Nexus ကို ကြြေငာတော့ dual core ဖုန်းကြီးကို လိုချင်ပြီး စောင့်နေခဲ့တယ်။ ဖုန်းထွက်လာတဲ့အခါ screen size က 4.7” ဆိုတော့ တော်တော်ကို ကြီးနေတယ်။ ဆိုင်သွားကြည့်လိုက်.. ငါ့လက်နဲ့ ကိုင်လို့ ဆန့်ပါ့မလားတွေဝေလိုက် ပြန်လာလိုက်.. စျေးနည်းနည်းကျသွားတာ ကြည့်လိုက် ဝယ်မယ်လုပ်လိုက်.. SD card ထည့်လို့မရတော့ မဟုတ်သေးပါဘူး ဆိုပြီးပြန်စဉ်းစားလိုက်နဲ့ သုံးလလောက် ကြာသွားခဲ့တယ်ကွယ်။ :D

နောက်ဆုံးတော့လည်း Nexus ဖုန်း လိုချင်တဲ့ ရောဂါ တော်တော်ရင့်နေလေတော့ ဖုန်းစျေးနှုန်းကို အမြဲ ကြည့်ရင်း ကိုယ်မှန်းထားတဲ့စျေးလောက်ထိကျသွားတော့ ဝယ်ဖြစ်သွားတယ်။ GNex က android 4.0 (Ice-cream sandwich) OS နဲ့ ပထမဆုံး ထွက်လာတဲ့ ထုတ်တဲ့ဖုန်းပါ။ ဒါပေမယ့် အခုက iPhone 4S နဲ့ SGS2 ခေတ်ဆိုတော့ GNex က လူကြိုက်များပုံမရဘူး။ ဆိုင်တွေမှာတောင်သိပ်မတင်ဘူး။ တစ်ခြားဖုန်းတွေနဲ့စာရင်လည်း စျေးကျတာ တော်တော်မြန်တယ် ပြောရမယ်။ 
၂၄နာရီအတွင်း စမ်းသပ်ကလိထားသလောက် ဘက်ထရီကတော့ အန်းဒွိုက်ဖုန်းတို့ ထုံးစံအတိုင်း ကုန်တာမြန်တယ်။ optimize ပြန်လုပ်ရမယ်။ live wallpaper ဖြုတ်၊ network ကို 2G network only လုပ်ထားရင်တော့ ဘက်ထရီစားတာ နည်းနည်းသက်သာသွားမယ်။ Google Search bar လေးကို တော်တော်သဘောကျမိတယ်။ application တွေ ရှာရလွယ်သွားတယ်။ Gnex က ဂူဂယ်လ်ဖုန်းဆိုတော့ Samsung flagship ဖုန်းတွေမှာလို Swype တို့ Polaris office တို့လို built-in application တွေ များများစားစားပါမလာဘူး။ Google Product တွေဖြစ်တဲ့ google+, movie studio, music, youtube, maps အဲလောက်ဘဲပါတယ်။ တစ်ခြား Galaxy ဖုန်းတွေလို font အလွယ်တကူ ပြောင်းမရပြန်ဘူး။ မြန်မာစာတွေဘာတွေသွင်းဖို့ bootloader ကို unlock လုပ်ရဦးမယ်။ Nexus One တုန်းက HTC ရဲ့ Sense UI ပါမလာသလို အခု Galaxy Nexus မှာလည်း Samsung ရဲ့ Touchwiz မထည့်ထားပေးဘူး။ အဲဒါကြောင့်လည်း Gnex ဟာ SGS2 ကို စျေးကွက်မှာ မယှဉ်နိုင်တာ ဖြစ်မယ်။ review တွေအရတော့ Gnex မှာ SGS2 ထက်သာတာ screen size တစ်ခုဘဲရှိတယ်ဆိုပေမယ့် ကိုယ်က nexus မှ nexus ဖြစ်နေတော့ ဒီဖုန်းဘဲ ဝယ်ဖြစ်ခဲ့တယ်။

မနေ့က သူငယ်ချင်းတစ်ယောက်လည်း ဖုန်းဝယ်တော့ သူ့ဖုန်းလည်း ကလိကြည့်ရင်း တစ်ခုသတိထားမိတယ်။ (သူဝယ်တာက Samsung Galaxy W, Gingerbread)။ သူ့ဖုန်းရော ကျမဖုန်းပါ Android market မှာ စစချင်း 3MB, 4MB လောက်ရှိတဲ့ app တွေ ဒေါင်းလုတ်လုပ်တော့ လုံးဝကို တက်မလာဘူး။ နောက်ဆုံး 500kb လောက်ရှိတဲ့ app တစ်ခု အရင်ဒေါင်းပြီးမှ ကျန်တာတွေ ဘယ် size ဖြစ်ြဖစ် ဒေါင်းလုတ် လုပ်လို့ရသွားတယ်။ ထူးတော့ ထူးဆန်းတယ်။ ဖုန်း၂လုံးစလုံး အဲလိုဖြစ်တာ။ ဒါပေမယ့် အင်တာနက်သုံးတဲ့ ဒေတာကဒ်ကြောင့်ဘဲ ဖြစ်မလား မပြောတတ်ဘူး။

အရင်ဖုန်းတုန်းက android 2.2 Froyo ထိဘဲ update လုပ်ခဲ့တယ်။ ကြားထဲကထွက်တဲ့ Gingerbread ကို မသုံးဖူးလိုက်တော့ compare မလုပ်ပြတတ်ဘူး။ တစ်ခုက Froyo မှာတုန်းက app တွေ ဒေါင်းလုတ်လုပ်ရင် အကုန်လုံး တပြိုင်တည်း multi-task ဒေါင်းလုတ်ချပေးတယ်။ အခုက Gingerbread နဲ့ ICS မှာ app တစ်ခုပြီးမှ နောက်တစ်ခုကို စဒေါင်းလုတ်လုပ်တယ်။ သိပ်တော့သဘောမကျလှဘူး။

Image credits: Pho.to blog 
ပြီးတော့ ဖုန်းမှာ စစချင်း market app ပါတယ်။ အခြား app တစ်ခုလောက် ဒေါင်းလုတ်လုပ်ပြီးတာနဲ့ Android Market ကြီး အပ်ချလောင်းဆိုပျောက်သွားပြီးတော့ Play Store ဆိုပြီး အလိုလို ပေါ်လာရော။ ဘာဖြစ်တာပါလိမ့်လို့ ကြောင်တောင် ကြောင်သွားတယ်။ Google က သူ့ရဲ့ Android Market ကို Google Play Store လို့ rebrand လုပ်လိုက်တဲ့ သတင်းကို မတ်လ ၆ရက်နေ့မှာ ကြေငြာသွားတာ မဖတ်လိုက်မိတာကိုး။ ခုမှ ပြန်ရှာဖတ်လိုက်မိတယ်။ (ref: Goodbye Android Market, Hello Google Play)

အရင်ဖုန်းအဟောင်းလေးက memory limited ဖြစ်တော့ app တောင်သိပ်မသွင်းဖြစ်ဘူး။ စိတ်ဝင်စားဖို့ကောင်းတဲ့ app လောက်တွေ့မှ ရှာပြီးသွင်းဖြစ်ခဲ့တယ်။ ခုက app တွေသွင်းဖို့ memory 16GB တောင်ဆိုတော့ ပျော်ပျော်ကြီး ကလိလို့ရပြီ။ ကိုယ်ဘဲ android market ကို browse မလုပ်တာ ကြာသွားလို့လား market ကနေ play store ဘဲဖြစ်သွားသလားတော့မသိ။ app category တော်တော်များမျာရဲ့ top free ရဲ့အောက်မှာ 18+ content နဲ့ app တွေ မနည်းမနော တွေ့လိုက်ရတယ်။ တော်တော်အောင်မြင်နေပါလားနော်။ အဲဒါနဲ့ settings ထဲဝင်ပြီး High maturity ကို အမြန်သွားဖြုတ်ရတယ်။ auto က "all" လုပ်ထားတာဆိုတော့။ မဟုတ်ရင် တစ်ခြား app တွေက အဲသဟာတွေကြားမှာ ပျောက်တောင်နေတယ်။

ခုတော့ ဖုန်းလေးကို တော်တော်သဘောကျနေတယ်။ size ကကြီးတယ်ဆိုပေမယ့် လက်ထဲ တကယ်ရောက်လာတော့လည်း သိပ်မဆိုးပါဘူး။ ဖုန်းကာဗာက Google ဆိုတဲ့ လိုဂိုကို တစိမ့်စိမ့်ထိုင်ကြည့်တယ်။ :D web browsing ရယ် ဂိမ်းဆော့ရတာရယ် အင်မတန်ကောင်း။ camera ကတော့ သိပ်မကောင်းဘူး။ smart phone တွေရဲ့ ကင်မရာကို အကောင်းကြီးလည်း မမျှော်လင့်ထားတော့ စိတ်မပျက်မိဘူး။ Android 4.0 ရဲ့ panaroma capture လုပ်လို့ရတာလေးတော့ သဘောကျမိတယ်။ ၁၈၀ဒီဂရီတောင်မကဘူးထင်တယ်။ တော်တော်ကျယ်ကျယ်ထိ ဆွဲလို့ရတယ်။ capture rate ကလည်း မြန်မှမြန်.. ရိုက်မှ ရိုက်လိုက်သလားလို့ ပြန်ပြန်စဉ်းစားယူရတယ်။ တစ်ခြားတော့ ဘာမှသိပ်မစမ်းကြည့်ရသေးဘူး။ နောက်မှ Ice−cream Sandwich ကို သေချာမြည်းစမ်းကြည့်ပြီးမှ ပို့စ်ထပ်ရေးပါဦးမယ်။ :) 
 ဒီပုံကတော့ ဒီနေ့ batu caves ဟိန္ဒူဘုရားကျောင်း ရောက်ဖြစ်တော့ ဖုန်းနဲ့စမ်းရိုက်ထားတဲ့ panaroma


Aythayar Vineyard

လွန်ခဲ့တဲ့ တစ်နှစ်ကျော်ကျော်လောက် တောင်ကြီးပြန်ဖြစ်တုန်းက ရိုက်ထားတဲ့ ပုံလေးတွေ။ sunset wine garden တောင်ကြီးမြို့အထွက် အေးသာယာမြို့သစ် မရောက်ခင်လောက်နားမှာရှိတာ။ တောင်ကြီးမြို့ထဲကနေ ဆိုင်ကယ်နဲ့ မိနစ်၂၀လောက်မောင်းရင် ရောက်တယ်။ မပြန်ခင်တစ်ရက်မှာ သူငယ်ချင်းတွေလာခေါ်တာနဲ့ လိုက်သွားဖြစ်တယ်။ ဒီတိုင်းဆို ရောက်ဖြစ်မှာမဟုတ်။ ဒီမှာသာ လျှောက်သွားနေတာ၊ အိမ်ရောက်တာနဲ့ ခြေချုပ်မိတာများတယ်။ ဝိုင်ခြံက ဖွင့်ထားတာ သိပ်မကြာသေးဘူး။ မကြာဆိုတာ လေးငါးနှစ်ပေါ့ :D တောင်ကြီးမှာ လည်စရာ ပါတ်စရာ တစ်နေရာ တစ်ခု တိုးသွားတယ်။
sunset wine garden အဝင်ဝ.. ဘေးကပုံက သူငယ်ချင်းပြောတာ.. ကောင်းတယ်ဆိုတဲ့ဝိုင်.. တစ်ပုလင်းကို တစ်သောင်းဝန်းကျင်ထင်တယ်။ ကျန်တဲ့သူတွေက ဆိုင်ကယ်မောင်းရဦးမှာဆိုတော့ ကော်ဖီဘဲသောက်ကြတယ်။ ဝိုင်ကို ခွက်လိုက်မှာသောက်လည်းရတယ်။ menu နဲ့စျေးနှုန်းတွေကို ဒီမှာ နဲ့ ဒီမှာ ကြည့်လို့ရတယ်။ သူများတင်ထားတာ။
စပျစ်ပင်ဆိုတာလည်း အဲခါမှ သေချာမြင်ဖူးတော့တယ်။ စိုက်ခင်းတွေ အစီအရီနဲ့ အရမ်းကို လှလွန်းတယ်။
စပျစ်ခြံကနေ လှမ်းမြင်နေရတာ အောက်က အေးသာယာမြို့သစ်နဲ့ ထုံးဖိုမြို့တို့ပေါ့။ 
ဝိုင်မသောက်ချင်လည်း ကော်ဖီတို့ အအေးတို့ဘဲမှာပြီး ခြံလေးထဲမှာ လမ်းလျှောက်၊ ဓါတ်ပုံရိုက်လို့ရအောင် လမ်းလေးတွေ သေချာလုပ်ထားပေးတယ်။ အဲနေ့က မိုးတွေ တစ်အားအုံ့နေတာနဲ့ မြန်မြန်ပြန်ခဲ့ရတယ်။ တော်သေးလို့ မိုးမမိတာ။ 

ဝိုင်ခြံအကြောင်းကို ဒီပြန်ရောက်မှဘဲ အင်တာနက်က ပြန်ရှာဖတ်ဖြစ်တယ်။ Myanmar Vineyard website မှာ ရေးထားသလောက်တော့ ဂျာမန်လူမျိုးလုပ်ငန်းရှင်တစ်ယောက်က ၁၉၉၈ လောက်မှာ ဥရောပကနေ စပျစ်ပင်မျိုးတွေသယ်ခဲ့ပြီး လွိုင်ကော်မှာ စမ်းစိုက်ကြည့်တယ်။ ၁၉၉၉ မှာ အေးသာယာမြို့သစ်နားကို ပြောင်းရွှေ့ခဲ့ပြီး ၂၀၀၄မှာ ပြည်တွင်းမှာ ဖြန့်ဖို့ ဝိုင်စတင်ထုတ်လုပ်နိုင်ခဲ့တယ်။ ခုချိန်မှာ နိုင်ငံခြားကို တင်ပို့နိုင်တဲ့ အရည်အသွေးမြင့် ဝိုင်တွေကို ထုတ်လုပ်နိုင်ခဲ့ပြီ ဆိုပါတယ်။ အခုဆို ပြည်တွင်းပြည်ပ ဧည့်သည်တွေအတွက် Tourist attraction တစ်ခု ဖြစ်လာခဲ့ပြီ။ တော်တော်လှတဲ့နေရာလေးပါ။ တောင်ကြီးအင်းလေးသွားလည်မယ်ဆို လမ်းကြုံဝင်လည်သင့်တဲ့ နေရာလေး တစ်ခုပေါ့။


Rakhine fish noodle soup (ရခိုင်မုန့်တီ)

ဒီနေ့မနက်ထတော့ ဘာစားရင်ကောင်းမလဲ ဆိုပြီး လှန်လှောရှာရင်း ငါးဝယ်ထားတာတွေ့တာနဲ့ ရခိုင်မုန့်တီ ချက်စားမယ် စိတ်ကူးမိတယ်။ အရင်တစ်လလောက်က မြန်မာဆိုင်ဘက်ရောက်တုန်း မုန့်တီခြောက်ဝယ်ထားတာ ရှိနေတော့ အတော်ဘဲဖြစ်သွားတယ်။ ရခိုင်မုန့်တီ မချက်ဖြစ်တာ ၁နှစ်လောက်ရှိပြီထင်တယ်။ ဒီချက်နည်းကိုလည်း အရင်တစ်ခေါက် ပုစွန်ရခိုင်ချက် လိုဘဲ ရခိုင်က အစ်မကြီးတွေနား သင်ထားတာ။ ချက်ထားပြီး ၂ရက်လောက် ဒါချည်းထိုင်စားမှာဆိုတော့ လေးယောက်စာ လောက်ရှိမှာပေါ့။ :D 

လိုအပ်သော အဆာများ (လေးယောက်စာ) 
ငါး ၂ကောင် (ကြီးရင် တစ်ကောင်ဆိုလောက်ပါတယ်။) 
ငရုတ်သီးစိမ်း ၁၀ တောင့် 
ကြက်သွန်ဖြူ ၂လုံး 
ငရုတ်ကောင်းစေ့ အနည်းငယ် 
မုန့်တီခြောက် အထုပ်တစ်ဝက် 
သံပုရာသီး(သို့)မန်ကျည်းမှည့် ၊ နံနံပင်
ပြင်ဆင်ခြင်း 
၁။ ငါးကိုအကြေးခွံခွါပြီး အညှီနံ့ပျောက်အောင် ဆားနဲ့ပွတ်ဆေးတယ်။ (ဆားများများနဲ့ပွတ်ဆေးလိုက်တာနဲ့ အညှီနံ့တော်တော်ကို ပျောက်သွားတာ။ ငါးရိုးတွေနဲ့ ထိုးမိပြီး  လက်တော့ ခဏခဏရှတယ်။ :D) ပြီးရင်ရေနည်းနည်းနဲ့ ငါးမိနစ်လောက်ပြုတ်။ ညှီမှာစိုးလို့ စပါးလင်နည်းနည်းထည့်ပြုတ်လိုက်တယ်။ အအေးခံပြီး အသားနွှင်ထားပါ။ ငါးပြုတ်ရေရဲ့အနံ့ကို မကြိုက်လို့ ပြန်မသုံးတော့ဘူး
၂။ ငရုတ်သီးစိမ်းကိုပြုတ်ပြီး  ညက်အောင်ထောင်းထားပါ။ 
၃။ ကြက်သွန်ဖြူတစ်လုံးကို ညက်အောင်ထောင်းပြီး ကျန်တစ်လုံးကို ဆီချက်ချက်ဖို့စဉ်းထားပါ။ 
၄။ ငရုတ်ကောင်းအမှုန့်ထက် ငရုတ်ကောင်းစေ့ထောင်းထည့်ရင် ပိုမွှေးတဲ့အတွက် ငရုတ်ကောင်းစေ့ ထမင်းစားဇွန်းတစ်ဝက်ခန့်ကို ညက်အောင်ထောင်းထားပါ။ 
၅။ မန်ကျည်းမှည့်ရှိလျှင် ရေဖျော်ထားပါ။ မရှိလျှင် သံပုရာသီး စိတ်ထားပါ။ 

ချက်ပြုတ်ြခင်း 
ငါးအနှစ်သပ်သပ် ဟင်းရည်သပ်သပ် ချက်ပါမယ်။ သပ်သပ်ချက်ရြခင်း အကြောင်းရင်းက အစပ်သိပ်မစားနိုင်တဲ့သူတွေ အနှစ်လျှော့ထည့်၊ စားနိုင်တဲ့သူ အစပ်ပိုထည့်လို့လည်းရတယ်။ အရည်မစားချင်တဲ့သူအတွက် အနှစ်ရယ် ကြက်သွန်ဆီချက်လေးရယ်နဲ့ အသုပ်လုပ်စားလည်း အဆင်ပြေအောင်ပေါ့။ ခုနက ပြင်ဆင်ထားတဲ့ အဆာပလာတွေကို အောက်ကလို ၂ပုံခွဲလိုက်တယ်။ ဘယ်ဘက်က ဟင်းရည်အတွက်၊ ညာဘက်က အနှစ်အတွက်။
ဟင်းရည် 
ရေနွေးဆူလာရင် နွှင်ထားတဲ့ ငါးတစ်ဝက်ရယ်၊ ထောင်းထားတဲ့ ကြက်သွန်ဖြူတစ်ဝက်ရယ်၊ ငရုတ်ကောင်း၊ ဆား၊ ဟင်းချိုမှုန့်၊ ငံပြာရည်အနည်းငယ် တို့ကို သင့်တော်သလို ထည့်ပြီး ဆူအောင်ထပ်တည်ပါ။ 

ငရုတ်သီးအနှစ်
ဒယ်အိုးထဲကို ရေနည်းနည်းထည့်ပြီး ပူလာရင် အခုနက ဖယ်ထားတဲ့ ငါးတစ်ဝက်ရယ်၊ ကြက်သွန်ဖြူရယ်၊ ထောင်းထားတဲ့ ငရုတ်သီးစိမ်း၊ ဆား၊ ဟင်းချိုမှုန့်တို့ထည့်ပြီး မီးအေးအေးနဲ့ ပွက်အောင်တည်ပါ။ 
ရခိုင်မုန့်တီနဲ့ တွဲစားဖို့အတွက် ကြက်သွန်ဖြူ ဆီချက် ချက်၊ မကျည်းသီးမှည့်အနည်းငယ်ကို ရေနွေးနဲ့ ဖျော်ထား (မရှိရင်တော့ သံပုရာသီးပေါ့)။ မုန့်ဖတ်၊ ဟင်းရည်၊ ငါးအနှစ်လိုသလိုထည့်၊ ကြက်သွန်ဖြူဆီချက်၊ မန်ကျည်းသီးအရည် အနည်းငယ်၊ နံနံပင်၊ ငါးဖယ်ဆုပ် ရှိလျှင်ထည့်။ ရောသမမွှေလိုက်ရင် အရသာရှိသော ရခိုင်မုန့်တီကို ရပါပြီ။ (ဒီနေ့တော့ အရသာ သိပ်မရှိဘူး။ :D ငါးဖယ်နဲ့ အကြော်မပါလို့။ မလေးရှားမှာ ငါးဖယ်ငါးမရတော့ ပင်လယ်ငါးတစ်မျိုးဖြစ်တဲ့ Ikan Tenggiri နဲ့လုပ်စားရတယ်။ ငါးဖယ်လောက် မစေးပေမယ့် စားလို့တော့ ကောင်းတယ်။) လွယ်တာတော့ တော်တော်လွယ်တယ်။ ချက်နည်းတွေတော့ တစ်ယောက်နဲ့ တစ်ယောက် မတူကြဘူး။ တစ်ချို့တွေက ပဒဲကောတို့ဘာတို့ ထည့်တယ်ဆိုလား။ ဒီနည်းကို သဘောကျတာက ငါးရုတ်သီးအနှစ်ကို သပ်သပ်ချက်လို့။ စားချင်လို့သာ ချက်စားရတာ။ ခုတလော ရာသီဥတုက တော်တော်ပူနေတယ်။ တောင်ကြီးလို အေးတဲ့နေရာမှာ ညနေစာ ရခိုင်မုန့်တီစားရတဲ့အရသာကို လွမ်းမိပါသေးတယ်။ 
ပွဲပြင်ထားတဲ့ပုံမတင်ပါလားဆိုပြီး comment မှာမေးသွားလို့ နောက်တစ်ခေါက်ချက်စားတဲ့အခါ သေချာဓါတ်ပုံရိုက်ပြီး တင်လိုက်တာ :)


Marina nugget, Sakura chicken and salad

ရောက်တတ်ရာရာ စားစရာ သောက်စရာလေးတွေအကြောင်း ရေးရဦးမယ်။ ခေါင်းစဉ်သာ ရောတပ်လိုက်တာ၊ အဲသုံးခုလုံးက စားစရာဖြစ်ပေမယ့် ဘာမှ မဆိုင်ကြပါဘူး။ :D

၁။ Marina Cheddar Cheese Chicken Nugget
တစ်နေ့ ရုံးမှာ ပိတ်ရက်ဘာချက်စားကြသလဲဆိုတဲ့ အကြောင်းပြောကြရင်း nugget အကြောင်းရောက်သွားရော။ ပုံမှန်ဆို chicken nugget တွေ စားရတာ ဖော့တုံးကြီးဝါးနေရသလိုဘဲ သိပ်မကြိုက်ဘူးလို့ပြောတော့ colleague တစ်ယောက်က Marina တံဆိပ်နဲ့ဟာ ဝယ်စားကြည့်ပါလားတဲ့။ သူဆို ရုံးပိတ်ရက်တွေမှာ nugget ချည်းကြော်ပြီး ထိုင်စားတယ်ဆိုလို့ ဝယ်စားကြည့်တာ။ တော်တော့်ကို အရသာရှိတယ်။ ခုတော့ ရုံးပိတ်ရက်တွေမှာ ဟင်းချက်ပျင်းရင် nugget လေးကြော် ကြက်ဥဟင်းရည်ချက် ခရမ်းချဉ်သီးလေးသုပ်လိုက်ရင် ထမင်းတစ်နပ် ကောင်းကောင်း စားဖြစ်ရော။

၂။ Sakura Chicken
Sakura Chicken ကို supermarket မှာ တွေ့တွေ့နေပေမယ့် စျေးက ပုံမှန် ကြက်သားတွေရဲ့ ၂ဆလောက်ပေးရတော့ ဘယ်လောက်စားကောင်းမှာမို့လဲ ဆိုပြီး မဝယ်စားဖြစ်တာ။ မလေးရှားက စီပီကြက်တွေလည်း အရသာမရှိလွန်းလို့ တော်ရုံ ကြက်သားဆို အာရုံမလာတော့ဘူး။ ဒါပေမယ့် ရုံးက ဘော့စ်က တစ်အားစားကောင်းတယ်ဆိုပြီး ခဏခဏပြောလွန်းလို့ စမ်းြပီး ဝယ်စားဖြစ်တာ။ ဂျပန်နည်းပညာနဲ့ မလေးရှားမှာ မွေးမြူတဲ့ကြက်တစ်မျိုးတဲ့.. တစ်ခြားစီပီကြက်တွေလို ဟော်မုန်းတွေမထိုးဘူး၊ စီပီကြက်က ၄၅ရက် သူတို့က ရက် ၆၀ မွေးတယ်ပေါ့။ ကြက်တွေကို ကိုယ်လက်လေ့ကျင့်ခန်းလုပ်ဖို့ ခြံကျယ်ကျယ်နဲ့ မွေးပြီး Live probiotics (ဒိန်ချဥ်လို ဘက်တီးရီးယားမွေးပြီးပွားတာမျိုးလားမသိ) ကျွေးတယ်ဆိုလား ပြောတာဘဲ။ Happy chicken ဖြစ်အောင်ထားပြီးမှ ရောင်းတဲ့သဘောပေါ့။ kampung chicken(တောကအိမ်မွေးကြက်) တွေက အဆီနည်းပေမယ့် သူ့အသားတွေက အရသာ မရှိဘူး။ ဒီ Sakura chicken ကြတော့ ပုံမှန်ကြက်တွေနဲ့စာရင် အဆီမရှိသလောက်နည်းပြီး အသားကလည်း တော်တော်နုတယ်။ ရင်အုပ်သားကလည်း အခြား စီပီကြက်တွေလို ခြောက်ခြောက်ကြီးဖြစ်မနေဘဲ နူးနူးအိအိနဲ့ စားကောင်းတယ်။ စျေးပိုပေးရပေမယ့် ပေးရတဲ့စျေးနဲ့ စားရတဲ့အရသာ တန်ပါတယ်။ Isetan မှာ အကောင်လိုက် တစ်ကောင်ကို RM20 နဲ့ရောင်းပေမယ့် Jusco မှာ အကောင်တစ်ဝက်ဆီ ခုတ်ပြီးသားကို ၁၀နဲ့ရောင်းတော့ အဆင်ပြေတယ်။ (ကီလိုဝက်နီးနီးတော့ ရှိမယ်ထင်တယ်။) ရုံးပိတ်ရက်လောက်ဘဲ ဟင်းချက်စားတာဆိုတော့ အကောင်တစ်ဝက်ဆို ၂ရက်စာလောက်တယ်။ ဒီနေ့တော့ ပြုတ်ကြော်လေး လုပ်ထားတယ်။ ချဉ်စော်ကားသီးခြောက်နဲ့ ကြော်ထားတာ ;-) (ချဉ်စော်ကားသီး ဘာလဲဆိုတာ မသိရင် အစိမ်းရောင်လွင်ပြင်မချောရဲ့ပိုစ့် မှာ ဖတ်နိုင်ပါတယ်။) အသီးလိုက်ရရင် ပိုစားကောင်းမှာ အခြောက်က အဲလောက်မချဉ်သလို မွှေးလည်း မမွှေးဘူး။ 
ချဉ်စော်ကားသီးခြောက်နဲ့ ကြက်သားကြော်
၃။ Salad
ထမင်းမစားချင်တဲ့ရက်တွေဆို salad ဘဲ အလွယ် သုပ်စားလိုက်တယ်။ သူငယ်ချင်းတစ်ယောက် အိမ်သွားတော့ သူသုပ်စားတဲ့ပုံ သဘောကျတာနဲ့ အဲအတိုင်း လိုက်လုပ်စားဖြစ်တယ်။ တူနာ(chunks tuna in sunflower oil သို့မဟုတ် tuna in water)၊ ဆလတ်ရွက်၊ ခရမ်းချဉ်သီး၊ ရှလကာရည်အနက်၊ ပဲငံပြာရည်အကြည်၊ သံပုရာသီး၊ ဆား၊ နှမ်းဆီအနည်းငယ်တို့ကို သင့်တော်သလိုထည့်ပြီး နယ်လိုက်ရင် တော်တော် အရသာရှိတာ။ သံပုရာသီးရော ရှလကာရည်ကော ထည့်ရတဲ့ အကြောင်းရင်းက အချဉ်တစ်အားကြိုက်လို့၊ ပြီးတော့ သံပုရာသီးရဲ့ အနံ့နဲ့ ရှလကာရည်ရဲ့ အရသာကို ကြိုက်တာ။ ကြားတာနဲ့ သွားကျိန်းနေဦးမယ်။ :D

သမုဒ္ဒရာဝမ်းတစ်ထွာကို ဖြည့်ရတာလည်း တော်တော်ပင်ပန်းတဲ့အလုပ်.. ရုံးပိတ်ရက် အိမ်မှာထိုင်နေရင် တစ်နေကုန် တစ်မျိုးပြီး တစ်မျိုး စားချင်ပြန်ရော။ ဒီလိုသာ ရုံးခဏခဏပိတ်ရင်တော့ ဝလာတော့မှာဘဲ..  

P.S thinzaroo.me ဒိုမိန်းပြန်ရသွားပြီ။ ;) အရင်တစ်နှစ်က သူငယ်ချင်းတစ်ယောက် လက်ဆောင်ဝယ်ထားပေးတာ။ အောက်တိုဘာမှာ expire ဖြစ်သွားတော့ renew လုပ်ဖို့ဆို စျေးက တက်သွားရော.. အဲဒါနဲ့ renew လုပ်သင့်မသင့် စဉ်းစားနေတုန်း backorder ဆိုပြီး စျေးက ဒေါ်လာ ၄၀လောက် ဖြစ်သွားပြန်ရော။ အခုမှ နဂိုစျေးအတိုင်းရလို့ ပြန်ဝယ်ထားရတာ.. hee.. ဘာရယ်မဟုတ်.. *.me ဒိုမိန်းလေးကို သဘောကျလို့။


i-city snow walk and LED forest

New year ညကို အိမ်ထဲမှာနေပြီးဖြတ်သန်းရမှာ သေမတတ်ကြောက်တဲ့ ဒီနိုင်ငံကလူတွေရဲ့ ရောဂါကူးသွားတာတော့ မဟုတ်ပေမယ့် new year's eve မှာ i-city ရောက်သွားတယ်။ i-city က snow walk အတွက် Groupon ကနေ ဗောက်ချာဝယ်ထားတာကို အဲနေ့မှ မသွားရင် ဆုံးတော့မှာမို့ သွားလိုက်တာ.. သူ့ဘာသူ new year's eve ဖြစ်သွားတာတော့ တိုက်ဆိုင်သွားတယ်။ i-city က KL ကနေ ၄၅ မိနစ်လောက် မောင်းရတဲ့ Shah Alam မြို့မှာ ရှိတာ။
ပုံမှန်စျေးက snow walk ကို ၃၅ရင်းဂစ် ပေးရပေမယ့် Groupon ကနေ ၂၀နဲ့ ရလိုက်တာ။ ၂၀ဘဲပေးရတဲ့ ဗောက်ချာမှာ snow walk အပြင် 2 rides တောင် အဆစ်ပါသေးတော့ တော်တော့်ကို တန်သွားတယ်။ အဲထက် ပိုတန်သွားသေးတာက ကစားစရာတွေ မစီးချင်လို့ ပိုနေတဲ့လက်မှတ်တွေကို မှောင်ခို ပြန်ရောင်းခဲ့သေးတယ်။ :D ကြိုသိရင် ဗောက်ချာတွေ အများကြီးဝယ်ထားပြီး အဝမှာ သွားထိုင်ရောင်းရင် တော်တော်မြတ်မယ်။ snow walk လက်မှတ်က မလေးနိုင်ငံသားဆိုရင် ၂၅ရင်းဂစ် နိုင်ငံခြားသားဆိုရင် ၃၅ရင်းဂစ် ပေးရတယ်။ မလေးရှားမှာ အဲလို ခွဲခြားခွဲခြားလုပ်တဲ့နေရာတွေ သိပ်များတယ်။ အဲလိုနေရာတွေရောက်ရင် လူရှုပ်နေတဲ့အချိန်ကို နည်းနည်း စောင့်လိုက်တယ်။ ပြီးရင် မလေးစကားနဲ့ ကျောင်းသားစျေးမရှိဘူးလား၊ ဘယ်အချိန်ဖွင့်လဲ၊ ဘယ်အချိန်ပိတ်လဲ ဘာညာ အများကြီးလျှောက်မေးပစ်တယ်။ မေးလို့ဝသွားရင် လက်မှတ်တစ်စောင်ပေးလို့ပြောလိုက်ရင် သူတို့က နိုင်ငံသားဘဲထင်ပြီး နိုင်ငံသားစျေးပေးလိုက်တာ များတယ်။ တစ်ခါတစ်လေတော့ ရစ်ပြီး မှတ်ပုံတင်တောင်းရင်တော့ ဘာမှမတတ်နိုင်ဘူး။ ဒါပေမယ့် ရမလားလို့ စမ်းကြည့်တာ မမှားဘူး။ ၁၀ခေါက်မှာ တစ်ခေါက်လောက်ဘဲ ရစ်ခံရတတ်တယ်။
Snow walk က Genting Highland က တစ်ခုထက်တော့ အများကြီး ပိုကျယ်တယ်။ ကင်မရာလည်း ယူခွင့်ပေးတော့ အဆင်ပြေတယ်။ Genting Highland က snow world မှာ ကင်မရာ မပေးယူဘူး။ အဝမှာ အနွေးထည်တွေ ပေးတယ်။ snow-walk သာပြောတာ။ fridge-walk လို့ ပြောင်းခေါ်ရမလိုလို.. ရေခဲသေတ္တာထဲ ရောက်သွားတဲ့ အတိုင်းဘဲ.. အေးခဲနေရော။ အထဲမှာ နာရီဝက်တောင် မနေနိုင်ပါဘူး။ ဓါတ်ပုံအများကြီးလည်း မရိုက်နိုင်.. ချမ်းလွန်းလို့။ ကြာကြာမှ တစ်ခါ သွားကြည့်ရင်သာ ကြည့်ကောင်းတဲ့ နေရာ တစ်နေရာပေါ့။ အထဲမှာ လျှောက်ပါတ်ကြည့်တယ်။ slider တစ်ခု ရှိတာကို စီးတယ်။ တစ်အားချမ်းလာတာနဲ့ မခံနိုင်တော့လို့ မြန်မြန် ပြန်ထွက်ခဲ့ရတယ်။ အပြင်ရောက်တော့ ဗိုက်ဆာတာနဲ့ ညစာစားကြတယ်။ စားပြီးတော့ LED forest ရှိတဲ့ဘက်ကို ထွက်ခဲ့ကြတယ်။ 
ညဘက်ရောက်သွားတာရယ် အပင်တွေက မီးရောင်စုံတွေရယ်ကြောင့် ဓါတ်ပုံရိုက်လို့ သိပ်မကောင်းတော့ဘူး။ ဒီလိုအချိန်မျိုးမှာ DSLR တစ်လုံးလောက် ဝယ်ချင်စိတ် တစ်ဖွားဖွား ပေါက်မိပါရဲ့။ LED မီးရောင်စုံနဲ့ အပင်တွေကတော့ တကယ်ကို လှတယ်။ ကစားကွင်းထဲမှာတော့ မူးနောက်နေအောင် ပါတ်ချာအီပေးတဲ့ ကစားနည်းတွေဘဲ များတယ်။ တစ်ခုလောက်စီးပြီး ထပ်မစီးချင်တော့တာနဲ့ ခုနက ပြောသလို ပိုတဲ့လက်မှတ် မှောင်ခို ပြန်ရောင်းပြီး ပြန်ခဲ့ကြတယ်။ :D အပြန်မှာ new year countdown ရောဂါ ဝင်လာတော့ Ampang Lookout Point ကိုသွားဖို့လုပ်ကြတယ်။ ကေအလ် တစ်မြို့လုံးက လူတွေများ ရောက်နေသလား ထင်ရလောက်အောင် လမ်းပိတ်နေလို့ တောင်ပေါ်မရောက်တစ်ရောက်နားမှာဘဲ ရပ်ပြီး fireworks ကြည့်ပြီး စိတ်ကျေနပ်လိုက်ရတယ်။

တောင်ပေါ်ကနေ ရိုက်တော့ ပုံက ဒီလောက်ဘဲ ထွက်တော့တယ်။ ကင်မရာမှာ long shutter မပါတော့ ပိုဆိုး။ တစ်နေကုန်လုံး သွားခဲ့သမျှ နေရာတွေက DSLR လိုချင်အောင် အလွန်ကို ဆွဲဆောင်နေတော့ မနည်း စိတ်ထိန်းထားရတယ်။ ဒါပေမယ့် DSLR ဝယ်လည်း သယ်နိုင်မှာ မဟုတ်လောက်ဘူး။ ပေါ့ပေါ့ပါးပါးရှိြပီး lens လဲလို့ရတဲ့ powershot တွေထဲကဘဲ စိတ်ကူးရမယ်။  တစ်နေကုန် လျှောက်သွားပြီး new year ကို တောင်ပေါ် မရောက်တရောက်လောက်မှာ countdown လုပ်လိုက်ရပေမယ့် ပျော်စရာနေ့လေးတစ်နေ့တော့ ဖြစ်ခဲ့တယ်။ ခါတိုင်းနှစ်တွေဆို new year ကို အိပ်ပြီး ကြိုဆိုတော့ တစ်နှစ်လုံးအိပ်ရေးဝတယ်။ ဒီတစ်နှစ်တော့ လမ်းပေါ်ကနေ new year ကြိုဆိုလို့လားမသိ.. ခုထိ တစ်ရက်မှကို အိပ်ရေးဝဝ မအိပ်ရသေးဘူး။ :D Anyway, နောက်ကျနေပေမယ့် Happy New Year ပါ။ :-)


Software alternatives on Mac OS X

ကွန်ပျူတာရယ်လို့ စသိကတည်းက ဝင်းဒိုးသုံးလာရာကနေ ရုတ်တရက် Mac ပြောင်းသုံးလိုက်တော့ အစပိုင်း ဆော့ဖ်ဝဲလိုက်ရှာရတာ တော်တော် ပင်ပန်းသွားသေးတယ်။ အဲဒီတော့ သူများမေးရင် ဖြေရလွယ်အောင်နဲ့ ကိုယ့်ကိုယ် ပြန်ရှာမနေရဘဲ မှတ်မိလွယ်အောင် သေချာ list လုပ်ထားပြီး နောက် အသစ်တွေတွေ့မှ ထပ်တိုးသွားလိုက်မယ်။ အခု သုံးတာ တစ်လကျော်ကျော်ဘဲရှိသေးတော့ သိပ်အများကြီး မရှိသေးဘူး။ ခုလောလောဆယ်တော့ ဘာ software မှ ဝယ်မသုံးဖြစ်သေးဘူး။ Free ရတာတွေဘဲ အရင် လိုက်ရှာသုံးနေရတယ်။ နောက်တော့ ဈေးလည်းသိပ်မကြီးတဲ့ iWork ဝယ်မယ်လို့ စဉ်းစားထားတယ်။

My favorites softwares on windows and their Mac Alternatives

Windows Mac OS X
Word Processor, Spreadsheet,
Powerpoint  
Microsoft Office Libre Office(Free)         
to unzip zip, rar, tar, bzip, etc 7-zip Unarchiver
FTP Client Filezilla Filezilla
MySql Client SQLYog Sequel Pro
Text-Editor Crimson Editor,
Notepad++
Text Wrangler (app store)
MacVim (app store)
Komodo Edit
Sublime Text 2
HTML, PHP, Javascript Editor   Eclipse for PHP Komodo Edit
Download Manager Lite Flashget iGetter
Screenshot taker Easy Capture Skitch
SVN Tortoise SVN Smart SVN *
IM gtalk Adium
Video Player GOM Media Player MPlayerX
Batch Photo Resizer Faststone Photo Resizer       ResizeIt (app store)
Media Converter Format Factory ANY Video Converter (app store)
Basic Photo EditingPicasaPicasa
DesignPaint.NETGIMP
*Not so satisfied, still searching for alternatives.

တစ်ခြားအသုံးဝင်တာလေးတွေရှိလည်း လမ်းညွှန်သွားပါဦး။ Free software ဖြစ်ဖြစ်..ဈေးသိပ်မကြီးဘဲ ပေးရတာနဲ့တန်တဲ့ Paid app ဖြစ်ဖြစ်။ :)

** Komodo Edit ကို တော်တော်သဘောကျနေတယ်။ မြန်မာစာ support လုပ်တဲ့အပြင် HTML, CSS အတွက် တစ်ခါတည်း preview ပါပါတယ်။